Bondadosa

تفكير بعمق

2008-06-23T16:20:00.002-05:00

كنت عايزة أكتب حاجة بس من كتر ما بفكر بعمق اووووى مش عارفة اكتب اي حاجة دلوقتى !!!

اكيد مايهميش حد الموضوع ده لكن عادي بقي البلوج بتاعي و احب اخد راحتى فيه ...

و لو وصلت لحاجة هارجع اكتب تانى ...

اغاني رحلات

2008-05-30T09:47:00.002-05:00

من غير اي مقدمات ... ديه بعض اغاني الرحلات ... فيها بعض كلام غريب او كوميدي .... ما تاخدوش فى بالكم .D:

ولعة يا ولعة

ايوة يا واد يا ولعة

خدها و نزل الترعة

ولعة يا ولعة

طالعة تقشر فى الليمونة

نازلة تقشر فى الليمونة

حلف ابن المجنونة

ما هى نازلة الترعة

ايوة يا واد يا ولعة

طالعة تقشر فى التفاحة

نازلة تقشر فى التفاحة

حلف عليها ابن الفلاحة

ما هى نازلة الترعة

ايوة يا واد يا ولعة

خدها ونزل الترعة

طالعة ابطط فى الر قاق

نازلة ابطط فى الرقاق

حلف على بالطلاق

ماانا نازلة الترعة

طالعة أاطف فى الملوحية

نازلة أاطف فى الملوخية

حلف على ابن المؤذية

ماانا نازلة الترعة

طالعة احشى ورق الكوسة

نازلة احشى ورق الكوسة

حلف على ابن المنحوسة

ماانا نازلة الترعة

*****************************

يا سلام يا سلام ع المحبة والغرام

بنات تريح وبنات تتعب وبنات تودُي اللومان

يا سلام يا سلام

وحجيبهالــكوا على بلاطــة .. البنات خـلوها سلاطـــة

تقول لأمها رايحة للخياطة .. وهي مواعدة عشر شبان

يا سلام يا سلام

وحجيبهالكوا على الطبلية .. البنات خلوها ملوخــــــية

تقول لأمها رايحة الكلية .. وهي مواعـدا ابن الجيران

يا سلام يا سلام

*****************************

الله اكبر، الله اكبرالله اكبر، فوق كيد المعتدي

أنا أسمي سوسو وعايز أحارب والنبي

إدوني فتلة، إدوني فتلة أشنق بيها المعتدي

إدوني لبانة، إدوني لبانة ألزق بيها المعتدي

إدوني بمبة، إدوني بمبة أفرقع بيها المعتدي

إدوني طوبة، إدوني طوبة أعور بيها المعتدي

إدوني أستك، إدوني أستك ألسع بيه المعتدي

إدوني شوكة، إدوني شوكة أشكشك بيها المعتدي

إدوني نبلة، إدوني نبلة أحدف بيها المعتدي

*****************************

ساباله و ساباله و يلا يا حلوة لمي الغلة

يا حلوة بصي يا حلوة طلي يا حلوة لمي الغلة

وريني شعرك وريني لتكوني قاعرة تعريني و ليلة الدخلة تقوليلي اهي باروكة و يلا

وريني عينيك وريني لتكوني عوره تعريني و ليله الدخلة تقوليلي اهي نضارة و يلا

و ساباله و ساباله و يلا يا حلوة لمي الغلة يا حلوة بصي يا حلوة طلي يا حلوة لمي الغلة

وريني وسطك وريني لتكوني تخينة تعريني و ليله الدخله تقوليلي اهو برمودا و يلا

و ساباله و ساباله و يلا يا حلوة لمي الغلة يا حلوة بصي يا حلوة طلي يا حلوة لمي الغلة

وريني رجلك وريني لتكوني عرجة تعريني و ليله الدخلة تقوليلي اهو كعب عالى و يلا

*******************************

حبيبي يا احمد يا اللى على الجبهه

يا روحي يا احمد ياللى على الجبهه

احمد ماجاشي لأ لأ

و لا عاداشي لأ لأ

و لا سابشي بوسه لأ لأ

من قعر الكوسة لأ لأ

حبيبي يا احمد يا اللى على الجبهه

امك تدعيلك ست سنين

و ابوك يدعيلك ست سنين

و انا خايفة عليك من اليهودين

حبيبي يا احمد يا اللى على الجبهه

يا روحي يا احمد ياللى على الجبهه

امك تدعيلك ست شهور و ابوك يدعيلك ست شهور

و انا خايفة عليك لا تروح و تغور

و حبيبي يا احمد يا اللى على الجبهه

يا روحي يا احمد ياللى على الجبهه

امك تدعيلك ست اسابيع

و ابوك يدعيلك ست اسابيع

و انا خايفة عليك لا تروح و تضيع

و حبيبي يا احمد يا اللى على الجبهه

يا روحي يا احمد ياللى على الجبهه

امك تدعيلك ست ايام

و ابوك يدعيلك ست ايام

و انا خايفة عليك لا تروح و تنام

و حبيبي يا احمد يا اللى على الجبهه

يا روحي يا احمد ياللى على الجبهه امك

تدعيلك ست ساعات

و ابوك يدعيلك ست ساعات

و انا خايفة عليك لا تروح و تبات

و حبيبي يا احمد يا اللى على الجبهه

يا روحي يا احمد ياللى على الجبهه

امك تدعيلك ست ساعات

و ابوك يدعيلك ست ساعات

و انا خايفة عليك لا تروح و تبات

امك تدعيلك ست ساعات

يا روحي يا احمد ياللى على الجبهه

امك تدعيلك ست دقايق

و ابوك يدعيلك ست دقايق

و انا خايفة عليك لا تروح و تضايق

و حبيبي يا احمد يا اللى على الجبهه

يا روحي يا احمد ياللى على الجبهه

امك تدعيلك ست ثوانى

و ابوك يدعيلك ست ثوانى

و انا خايفة عليك لا تروح تنساني

**************************************

ليّ ليّ ليلاه.. ليّ ليّ ليلاه ليّ ليّ ليلاه.. وكمان ليلاه

ودخلت (الطب) برجــليا ودخلت ولا سمّوا عليّا

وطلعت منها بعد سنــــين أول مريض مات ف إيديا

ودخلت (خدمة اجتماعية) ودخلت ولا سمّوا عليّا

وطلعت منها بعد ســــنين مصاب بعقدة نفسية

ودخلت (بيطري) برجليا ودخلت ولا سمّوا عليّا

وطلعت منها بعد ســــنين بأربع رجول وكمان ليَة

ودخلت (حقوق) برجليا ودخلت ولا سمّوا عليّا

وطلعت منها بعد ســـنين نصاب كبير أد الدنيا

ودخلت (إعلام) برجـليا ودخلت ولا سمّوا عليّا

وطلعت منها بعد ســـنين إريال كبير قد الدنيا

ودخلت (زراعة) برجليا ودخلت ولا سمّوا عليّا

وطلعت منها بعد ســــنين راكب حمار ع الزراعية

*****************************************

ياخد زميلي يانا ياما..

ياخد زميلي يا بلاش

كاتبة له ياما بإيدي المحاضرة..

وإزاي ياما ما ينقلهاش

قاعد ع البنش جنبي..

وأنا عيني في عينيه

من أولى لتانية ياما..

وأنا بارسم عليه

من تانية لتالتة ياما.

. وأنا أيدي ف أيديه

من تالتة لرابعة ياما..

وأنا بصرف عليه

وفي رابعة إداني بمبة..

إداني بمبه ليه

***************************

عطشان يا صبايا دلونى على السبيــل

مكتوب على باب شقتكو لله يا محسنين

عطشان يا صبايا دلونى على السبيــل

مكتوب على دولابكو البسو يا عريانين

عطشان يا صبايا دلونى على السبيــل

مكتوب على باب حمامكو انضفو يا معفنيـن

عطشان يا صبايا دلونى على السبيــل

القطه تخش بيتكو تطلع من غير رجليـن

عطشان يا صبايا دلونى على السبيــل

الفار يخش بيتكو يطلع يسـب الدين

ابـوك اتجوز امـك فى ليلـة زى الطيـن

عطشان يا صبايا دلونى على السبيــل

**************************************

و نتمني لكم رحلة سعيدة D:

ميكروبـــــــاص

2008-05-29T07:24:00.002-05:00

بناءاً على رغبت الريس الكبير اووووي جمعت بعض العبارات اللى بتكون مكتوبة على الميكروباصات و السيارات النقل فى مصر و اي خدمة يا بيه (;

تعمل حسابي أقدرك تهزر معايا أعورك
الحلوة لما تتدلع تخلي الأسفلت يولع

ما تبحلقش كده يا لوح دي جت بطلوع الروووح

ما تبصش كده يا عبيط الحلوة دي بالتقسيط

يا ناس يا شر كفايه آر

العين صابتنى و رب العرش نجانى

سوقوا بالررراحة يا بهايم أصل سوااااااااق العررررربية نايم
سهران لوحدي والتباع نايم
العجلة دوارة و الغلطة بخسارة
اوعى الوحش يا عم الجحش
الحلوة دي مش ورث دي جاية بخلع الضرس

على مهلك في المطبات ودلعني في الغيارات
الحلوة من اليابان وصاحبها راجل غلبان
إحنا الاساس و علمنا كل الناس عينك يا بارد عين العبد غدارة و عيب الرب ستارة
لو عشت هذلكم ولو مت ربنا يسهل لكم

والحلوه خوخه جت بعد دوخه
يـــــــــــا غدار
الحلوة من دمياط وعليها أقساط

قصه كفاح مش جايه على‏ المرتاح

و إنت مالك خليك في حالك

يا تهدي يا تعدي
سماح اخت هبه
يا ناس سبوني اسد ديوني
عايز تعييش وماتعدينييش
متبصليش بعين رضية و بص للى اندفع فيه ده أنا طلع ديين أمى فى السعودية
النبى لتصلى على النبى
الحلوه خوخه جت بعد دوخه
عضة اسد ولا لدغة ظالم
عضدت أسد و لا نظرت حسد
حلوة دية من الشرابية

العواف

2008-05-11T01:36:00.003-05:00

عايزة اكتب اي حاجة و خلاص ... عادي بقي مش مهم مش البلوج بتاعي ... سبوني بقي اخد راحتى فى الكلام
يمكن ما حديش يقري او يسمع بس اديني بتكلم و خلاص يمكن او احتمال او جايز حد يسمعني ...
انا بتكلم عن نفسي كمواطن مصري ... تعبان مطحون مخنوق بس الحمد لله بيضحك و بيبتسم و بيقاوم
بيضحك على ايه ! مبتسم ليه ! مش ده المهم المهم انى بقدر اعمل كده و اقاوم كل الظروف اللى كل الشعب تقريبا متعرض ليها و بنحمد ربنا ..
بس مش عارفة ديه سلبيه و لا لا
طيب افرضوا سلبية .. ايه اللى المفروض نعمله ؟؟؟
نبطل نضحك يعني ؟ ... و لا ايه ؟
طيب لو بطلنا نضحك هيكون حل ؟
طيب الحمد لله بنشتغل و مش قاعدين في بيوتنا ...
بنجري على اكل عيشنا بس برده بالعافيه بنعدي الشهر مع اننا بنقبض احسن من غيرنا ... طيب يا تري غيرنا عايشين ازاى ؟؟؟
يعني الواحد بيشتغل علشان يركب مواصلات و ياكل و يشرب و بس ...
طيب لو نفسه يعمل حاجة زيادة شوية و لا يتفسح و لا يتجوز " بعد الشر يعني " و لا يشتري لبس جديد و لا عربية و لا ........................................................................ يعمل ايه ؟؟
طيب حاجة تانية بجد ضاغطه على و على ناس كتير تقريبا الشعب كله
على طول الشوارع واقفه و المواصلات زفت و ما حديش بيتحرك من مكانه اللى بيسموها ال traffic jam
طيب ايه الحل انا بوصل لمرحلة عدم التنفس من الازدحام و التلوث و العوادم ...
يعني انت ممكن تكون مخطط انك تروح مشوار و تعمل حسابك قبلها بساعتين و برده ما بتوصليش
طيب علشان اوصل فى ميعادي مظبوط المفروض اتحرك قبلها بيوم و لا ايه ؟
كفايه كده علشان انا ابتديت ما اعرفيش اتنفس تانى :'(

كل سنة و انتم طيبين

2007-09-10T11:44:00.000-05:00

اللــــــهم بلغنـــــــا رمضـــــــان

كل سنـــــــة و انتم طيبين جميعاً ...

Happiness

2007-08-28T01:26:00.000-05:00

In the pic, just look at their condition... no place to sleep, still they have made some space for the dog ....... water poring from the roof but still each 1 of them have a peaceful smile on their face..Simply amazing!!!!!

The happiest people in the world are not those who have no problems,
but those who learn to live with things that are less than perfect.

Just Love hearing it :D

2007-08-20T02:24:00.000-05:00

A guy phones up his Boss, but gets the bosses' wife instead:"I'm afraid he died last week. " she explains.

The next day the man calls again and asks for the boss."I told you" the wife replies, "he died last week."

The next day he calls again and once more asks to speak to his boss.

By this time the wife is getting upset and shouts: "I'VE ALREADY TOLD YOU TWICE, MY HUSBAND, YOUR BOSS, DIED LAST WEEK! WHY DO YOU KEEP CALLING?"..."

Coz . . ." he replied laughing, "I just love hearing it. . .

صور × صور

2007-08-14T15:24:00.000-05:00

بناءاً على رغبه الجماهير

نزلت الصور ديه و اي خدمة يا دكتور اتيش :D:P

يا اخواتى عليه :D

بتبص على ايه يا والاه

اما ناس مخها تعبان

2007-08-14T04:52:00.000-05:00

مش عارفة اقول ايه على البنات اللى مخها تعبان و طبعا مش البنات بس .. الاولاد برده لكن نسبة اللي بيحصل فى البنات اكتر .....
يعني تكون مثلا بنت اهلها ناس بسيطة على اد حالهم و تكون مكسوفه من حالها ... فمثلا تكون بتكلم زميلها و لا زميلتها فى التليفون و تحسسهم انها قاعدة فى قصر هههههههههههههههه

لكم ان تتخيلوا الموقف ده حصل قدام اختى ... كان ليها واحدة صاحبتها و زميلها بيكلمها فى التليفون و بتقول عن اذنك بس هاقفل التكييف اصلي بردت و هي اساسا ما فيش تكييف عندها هههههههههههههههههههه
يعني افرضوا قرر يزورها فى البيت يبقى ايه الوضع بقي ساعتها :D

و لا لما تقول اصل الشغالة كانت بتعمل و تسوي و مامي قالتلى ابقي خلي بالك من الشغالة و هي يا عيني قعدة تنضف و لا فيه شغالة و لا غيره :D ... بجد الناس ديه بتصعب عليه اووووووي ... بيفضلوا يعيشوا نفسهم فى وهم و خيال و يفضلوا هربانيين من حقيقتهم و عايشيين على التمني ....

يعني لو كل واحد يعيش حقيقته و مش يهرب منها !!! ايه اللى هيحصل يعني ؟

أغرب الامثال

2007-08-09T14:26:00.000-05:00

العيلة اللى ما فيهاش صايع حقها ضايع

قبل ما تتجوز جابت المأذون وقبل ما تحمل سميته مأمون وقبل ما تولد جابت الكمون

جارك وراك وراك.......ان مشافش وشك هيشوف قفاك

يدلقوا القهوة من عماهم و يقولوا الخير جاهم

يا قلبي يا كتاكت يا مانتا شايل و ساكت

شعره من جلد الخنزير مكسب

الجنزير و الطوق ولا القعدة مع قليل الذوق

ارميه من على السطوح إن كان لك فيه قسمة ما يروح

مالك جاي ومعلق جرس؟ أصل ابن خالتي اشترى فرس

تي تي تي تي زي ما روحتى زي ما جيتي

كل شيلو يشبيهلو حتى الحمار و اللى انيه

الهون قال للمغرفة يا حلوة يا معجرفة قالتله هى هى هئ كلنا ولاد مطبخ

لما دخل المقبره بقي فى ط...... سكره :DD

جاي منين يا غراب؟؟ جاي من بحر قشطة .. كان بان على منقارك ..

الله يعطيك العافية طول ما الفرخة حافية

اللي ما يجينا وقلبه مشروح طريق السلامة زي ما جه يروح

اللي يعبي لك بالمعلقة عبي له بالجاروف و اللي يعمل فيك طيب ما تنساهوش

كيييف الخـ-- يشتريلو معلقه

يا مستنى السمنه من ورك النمله عمرك ما حتعمل تقليه

لو كان لك صاحب و عايز تبقيه , لا تاخد منه و لا تديه , و إن خدت منه و عايز تديه , حاسبه حساب يرضيه

عوره و ابوها عبد ودخلتها يوم الحد

البايره بيت ابوها اولا بيها

ناس تتباس و ناس تنداس و ناس تضرب بالمداس

انا وحشه وحشه و عاجبه نفسي و اشوف الحلوين تقرف نفسي

الحاجة اللى ماتهمك وصى عليها جوز أمك

باعتناها تاخد بطار ابوها رجعتلنا حبلي

كل فوله مسوسه ليها كيال معفن

خلي حبيبي على هواه يجي و اديله على قفاه

لو انا امير و انت امير مين يسوق الحمير

من برة هاللة هاللة و من جوة يعلم اللة

قعدة الخزانه و لا جوازة الندامه.....

ادوا البخوت لكروت الشعور

اصرف ما في الجيب واستلف مش عيب

الراجل عامل زي طابع البوسطة كل ما تتف عليه يلزق اكتر :D

يفوت عليا مايقولش عوافي.. وانا مربياه من لحم كتافي

كبر البصل و أدور و نسي حاله الأول

في فرحكم ابص وارجع .. وفي غمكم ليا التلات و الاربع

من باعك بيعه و ارتاح من قهره و ان كنت عطشان ما تورد على بحره

زي أم عثمان تكنس الوسط و تسيب الأركان

نغسل غسيل هلس و نتكل على الشمس

الديب متهوم و لو بات جعان

بعد ما كان بيحجل زي الغراب لبس جزمة و شراب

الشايب لما يدلع يبقى زي الباب المخلع

اللي ما يفهمش بالاشارة الكلام معاه خسارة

من غير سنان و نفسه ف اللبان

الغجرية ست جيرانها ان ما خافو منها خافوا من لسانها

قليل البخت جابولو لوح تلج هدية ....... طلع علي بختة التلج بيسخن المية

الحاجة في السوق تقول نيني نينيبكرة يجي الخايب يشتريني

اكل فول و اخرج قفايا عرض و طول .. ولا اكل كباب ووقفه الديانا وري الباب

أعمى ينادى أطرش لا ده شايف و لا ده سامع

عرضوا الامخاخ في السوق.... كل واحد عجبو مخة و عرضوا الارزاق في السوق..... كل واحد عجبو رزق غيرة

قلبي زي الدكان لكل واحد فيه مكان

العشق بعد الستين زي المش في الطين

الغريب لو صح أحسن من ألف أخ

بعت حسن يجيب حسين راحوا ولا جوني الاثنين

الشكرمون طاخ فى التراللى جاله انبثاق محلى امان ياللى

امثال شعبية

2007-08-08T15:36:00.000-05:00

حبني و خدلك زعبوط قلت هي المحبة بالنبوت

لا تذم و لا تشكر الا بعد سنة و ست اشهر

خد الاصيلة و لو كانت على الحصيرة

اخد ابن عمي و اتغطي بكمي

الخنفساء تقول ما حلى ولادي على الحيط لولى لولى و ملضومين فى خيط

.العين طق طق و البق لأ لأ

ايش تعمل الماشطه فى الوش العكر

الحلو حلو لو لسه صاحي من النوم و الوحش وحش لو بيستحمي كل يوم

فى الوش مرايه و فى القفه سلايه

خالتى و خالتك و اتفرقوا الخالات

عيني فيه و اقول اخيه

القرد فى عين امه غزال

جوزتها تتاخر راحت و جابته راخر

بكره نقعد جنب الحيطة و نسمع الزيطة

قاله يابا انا رايح من حداك قاله تريحني من فساك :DD

على وشك يبان يا نداغ اللبان

عرق واره ودنهم و مايحبوش مرات ابنهم

مش كل مرة تسلم الجره

هاتوا الجردل و اقلبوه يطلع الواد لابوه

اكفي القدرة على فمها تطلع البت لامها

ال يا رايح كتر من الفاضيح

البلد اللى ما حديش يعرفك فيها روح و شلح فيها :D

كل و بحلق بعنيك اكله و اتحسبت عليك

الجنازة حاره و الميت كلب

كله سلف و دين حتى المشي على الرجلين

بقها شبراوي عايزله زراير وعراوي

فرح عديله سبيه بلا نيله

هتجيب منين الريحة الحلوة يا مشئوم ده ابوك البصل و امك التوم

اعمل حاجتى بايدى ولا اقول للندل ياسيدى

الام تعشش و الاب يطفش اتحمل همك و هم غيرك تموت و انت واقف على حيلك

اديني حيه لما اشوف اللى جايه

سكتناله دخل بحماره

عقربتين على حيط و لا اختين فى بيت

ما اسخم من سيتي الا سيدي

قال خش نقى لك كلب قال الاسمر كلب والابيض كلب وكلهم كلاب ولاد كلاب

لو الناس تبقى منظمة شوية

2007-07-26T04:10:00.000-05:00

اوحش حاجة موجودة فى البلد عدم النظام ... يعني بجد لو فيه نظام للشغل و البلد و الناس تكون ملتزمة كل حاجة هتمشي كويس اوى .

يعني تلاقي الشركات مش بتحقق النجاح المطلوب او اللى ممكن تحققه .. طيب ليه ؟؟

طبعا علشان مش كل واحد عارف ايه وظيفته و ايه اللى المفروض يعمله..

بجد الناس بتفتقد لروح العمل بالمجموعة اللى بيسموها ال team work

كل واحد عايز ياخد شغل و يجري و يقدمه على انه اللى عمل و سوي و طبعا كله بيبقى غلط و مش مظبوط .

كل واحد عايز يقول انا اللى عملت و مش عايز غيره يظهر معاه علشن يكون هو واخد دور البطولة

و ده طبعا مش بيسبب نجاح اطلاقا ... لكن بيكون سبب فشل المكان كله .

عارفيين لو الناس منظمة كان مش هتلاقي زحمة فى الشوارع .. و هتلاقى كل شيء ماشي ببساطة

لكن للاسف احنا مش وصلنا للمرحلة ديه و لا هنوصلها طول ما احنا بالمنظر و الاسلوب ده .

ربنا يصبرني يا رب

سبوني افضفض

2007-07-26T03:58:00.000-05:00

بجد كل حاجة بقت تجيب اكتئاب ... ناس متخلفة .. نفسيتها تعبانة ...

تلاقي الناس بتنافق و تبيع نفسها و ضميرها علشان يكسبوا محبة مديرهم

المدير اللى هو مجرد بشر .. يعني لا يمكلك من امره شيء ...

يعني تلاقي الشخص ده رجله و القبر و لسه بيعمل كل النفاق و و و و و و و علشان مستني زيادة و لا مكافأة .... الخ

و بعد اللى بيعمله ده كله رايح يعمل عمره و حج .. طيب اللى بيعمله ده بيرضي ضميره و بيكون مرتاح و هو بيأذى الناس ...

و المضحك فى الموضوع يبقى بيعمل عمرة و حج و مش بيصلي !!! بذمتكم مش حاجة غريبة

يعمل نفسه انه بيتوضىء و يشمر و يبل ايده لكن مش يصلي ... طيب هو بيضحك على نفسه و لا على الناس و لا على ربنا .... بجد استغفر الله العظيم نماذج غريبة

و لا الاستاذ التاني اللى يا حرام يسمي ابنه اللى لسه مولود على اسم صاحب الشركة علشان يكسب وده

يعني تخيلوا يكون مثلا اسمه برعي هههههههههههههههههه كل ده علشان يكسب رضى فلان الفلاني

و الاظرف من كده انه سبحان الله و بالصدفة البحته - اللى هي طبعا مش صدفه - الموضوع مترتب هههههههههه

ابنه يتولد في نفس اليوم اللى فيه عيد ميلاد ولي نعمته - استغفر الله العظيم ...

يعني يعرض زوجته انها تولد قبل ميعاد الولادة الطبيعي علشان يكسب المدير ... لا حول و لا قوة الا بالله

طيب ده بقي شيء طبيعي بيحصل و لا انا اللى عندي حساسية زيادة و شايفه كل ده شيء غير مقبول بالنسبالى ..

طيب لو حاجة طبيعية حد يقولى !!!

يوميات مواطن مطحون

2006-10-28T06:44:00.000-05:00

المواطن المصري المطحون حياته كلها جري فى جري و بجد معذب من وقت ما بيصحى لحد ما بينام .

الواحد بينزل من بيته لا بيه و لا عليه يلاقى سواق ميكروباس شايله و خبطه و لما تيجي تدافع عن حقك يزعقلك و يقولك ايه فيه ايه هو انت حصلك حاجة ... من المفترض انك لازم تنزف دم و تترمي على الارض علشان يبقى حصلك حاجة و برده مش هيعملك حاجة هيسيبك و يمشي و موت يا حمار !!!!

ما فيش وش بشوش مبتسم ابدا ..... كله ماشي مكشر و بوزه قدامك شبرين ... القلة اللى ممكن تلاقيها مبتسمة اتنين مزوغين من المدرسة و ماسكين ايد بعض و بيحبوا فى بعض .... او على الكورنيش و الواد بيضحك على البنت بكلمتين و هي طبعا فاتحه بقها و منشكحة D: .

انتهاكات

2006-10-25T19:36:00.000-05:00

اللى بيحصل حولي فى كل مكان و عدم الامان اللى بقى موجود بيخلينى اكتب افكارى مع انى مش متعودة انى اكتب .

فعلا الفساد و انعدام الاخلاق موجود حوالينا فى كل مكان و فى كل حته ...

كنت فاكره اننا فعلا بلد الامن و الامان لكن للاسف كل يوم بتتفاجىء باخبار بتخليك تقلق و تخاف زيادة .

الحمد لله احنا مؤمنين بربنا لكن اكيد كل واحد فى اي لحظة بيفكر فى نفسه و اهله و انه ممكن يحصل فيه كتير فلازم نحذر من كل شيء .

فى الوقت الحالي بجد بسمع عن حاجات تقشعر لها الابدان من اغتصاب و انتهاك رجال و سيدات و اطفال و الكلام ده مش من حد غريب لا من اقرب الناس من ابناء بلدك و من ابناء دينك .... هما اكيد ما فيش دين فى دماغهم و الا ماكنيش حدث منهم ذلك .

الناس نيام و مش حاسين بمجريات الامور .... فعلا واخدين منوم و مسكرات و غافلين عن ما يحدث و ذلك لمصلحة من ؟؟؟؟

طبعا كلنا عارفين !!! لكن على رأي المثل اللى 99.9% من الناس ماشيين عليه " زي الانتخابات " خليك فى حالك و ماليكش دعوة !

يعنى مثلا اسمع و من ناس قريبة منى ان طفل 6 سنوات يقوم رجال بالتحرش الجنسي بيه !!! و كذلك مع اطفال بنات فى نفس سنه تقريبا .

التحرش بالسيدات و البنات مثلما حدث امس اول ايام العيد عند سينما ميامي من اغتصاب سيدات و فتيات منهم المحجبات و المنتقبات و المختمرات و غيرهم .... و ذلك من الاف الاشخاص فى غياب الشرطة .... طيب فين بذمتكم بلد الامن و الامان ؟؟؟

يعنى لما تكون واحدة نازلة من بيتها محترمة لوحدها او مع زوجها و يحصل فيها كده .... طيب ده في اي دين و لا ملة !!!

طيب احنا ازاى نترك ابنائنا ينزلوا الشارع و احنا مش قلقانين !!! الاول كنا بنخاف على البنات بس ... دلوقتى بنخاف على الاولاد اكتر من البنات .

2006-10-16T23:21:00.000-05:00

" لا تذم و لا تشكر الا بعد سنة و ست اشهر " فعلا المثل ده مهم جداً و لازم كلنا نفهمه و نستفيد منه ;)

مصرية

2006-10-16T22:07:00.000-05:00

أنا مصرية من ساسي لراسي